Nagsugod na subong nga adlaw, Enero 12, ang election period kag amo man ang implementasyon sang gun ban sa bilog nga Pilipinas.
Nakabase ini sa Omnibus Election Code kun sa diin nakasaad nga maga-umpisa ang election period 90 days antes ang adlaw sang election kag magatakop naman 30 ka adlaw pagkatapos sang piniliay ukon magatupa sa Hunyo 11.
Suno kay Commission on Elections (Comelec) Chairman George Garcia, sulit-sulit gid nga ginapahanumdom sa tanan nga indi gid pwede ang pagdala ukon pagbyahe sang mga armas ukon anuman nga makamamatay nga mga hinganiban magluwas lamang kun may nakasulat nga otorisasyon halin sa Comelec.
Indi man pwede makagamit ang mga kandidato sang security personnel ukon bodyguards magluwas lamang kun otorisado man sang komisyon.
Ginadumilian man ang pag-organisa kag paghupot sang reaction forces, strike forces, ukon kaangay sini nga mga grupo.
Indi man pwede ang pagsaylo ukon pag-reassign sang mga opisyal kag mga empleyado sa civil service magluwas lamang kun may nauna na nga approval halin sa poll body.
Indi man pwede ang suspension sang elective provincial, city, municipal ukon barangay officer nga wala sang prior approval sang Comelec.
Ang anuman nga paglapas sa namensyonar nga mga pagsulundan ang makonsiderar na nga election offense.
Mabug-at ang penalidad kaangay sang pagkapreso sang 1-6 ka tuig, disqualification sa pag-uyat sang public office, kag mahimo man nga makakasan sang kinamatarong nga makaboto.
Bangud hugot man ang mga security measures sa bilog nga pungsod, ginpahayag ni Philippine National Police (PNP) chief Gen. Rommel Francisco Marbil nga ang mga pulis sa checkpoints ang dapat man nga magsuksok sang body-worn cameras kag iban pa nga alternatibo nga recording devices.
Kinahanglanon ini suno sa iya agud masiguro nga protektado ang mga sibilyan kag malikawan nga may mga pagpang-abuso nga himuon ang PNP ukon paghimo sang anuman nga iligal nga akto.
Paagi sa body cameras suno kay Marbil, matuman sang pulis ang plain view doctrine kun sa diin nakasaad nga mahimo makuha sang law enforcement authorities ang ebidensya sa krimen ukon kontrabando nga makit-an sa plain sight ukon paagi lamang sa visual inspection.
Buot silingon sini, indi pwede nga buksan sang pulis ang trunk ukon glove compartment sang salakyan kag indi man pwede nga papanaugon kag maghimo sang body-search sa mga pasahero.
Iposisyon man ang security checkpoints sa masanag nga mga lugar kag mga areas nga may CCTV cameras kag dapat man nga naka-proper uniform ang mga police personnel kag dapat nga kit-anon ang name tags.
