𝗜𝗟𝗢𝗜𝗟𝗢 𝗖𝗜𝗧𝗬 – Preso ang isa ka Retired Philippine Coast Guard matapos ginluthang-patay ang isa ka barber sa Zone-6, Barangay Calumpang, Molo, Iloilo City.
Ang suspek amo si Noel Amboy, 66, kasado samtang ang biktima naman amo si Bryan Gabuelo, 42, kasado, lunsay residente sang nasambit nga lugar.
Sa interview sang Bombo Radyo kay Police Captain Ryan Christ Inot, hepe sang Molo Police Station, iya ginpahayag nga lunsay hubog ang suspek kag biktima sang natabo ang insidente.
Suno kay Inot, samtang naga-inom ang suspek sa ila balay, nagpanuktok ang biktima sa ila gate agud magpangayo sang sumsuman.
Sang ginbuksan na ang gate, gintuyo nga atakihon sang biktima ang suspek.
Diri na kag ginluthang ini sang suspek sa ulo kag sa lawas gamit ang .45 caliber nga armas nga amo ang gintunaan sang iya kamatayon.
Boluntaryo naman nga nagsungka ang suspek sa mga pulis kag gin-surrender sini ang iya armas kag isa ka empty shell sang .45 caliber.
Sa subong, preso na ini sa Molo Police Station sa diin magapangatubang ini sang kaso nga paglapas sa gun ban sa idalom sang COMELEC Resolution No. 11067.
