Magasaka ang presyo sang masobra 60 ka items sang basic necessities and prime commodities (BNPC) umpisa masunod nga bulan.
Ini matapos gin-aprubahan sang Department of Trade and Industry (DTI) ang request sang manufacturers para sa price adjustments.
Suno kay Trade Secretary Cristina Roque, sa 217 BNPCs sa suggested retail price (SRP) bulletin nga ginapaguwa sang ahensya, 72% lamang ang indi magsaka — buot silingon, may pagmahal sa nabilin nga 28% ukon katumbas sang 63 items.
Pahayag sang tiglikom, ‘minimal’ lamang ang price increase nga ginlaragway sini nga “below 5% and a little bit below 10%.”
Ginpaathag man sang opisyal nga nahangpan man sang ahensya ang bahin sang manufacturers rason nga gin-aprubahan ang ila hingyo nga magpataas sa presyo. Ginplastar nga rason sang manufacturers ang pagsaka man sa presyo sang raw materials amo man sa labor.
Base sa DTI, nalakip sa items nga may aprubado nga price adjustments amo ang canned sardines, kandila, batteries, kag powdered milk.
“Next month will be the start of the price increase… at least there’s also enough time for us to tell the consumer that there would be a slight price increase,” suno pa sa tiglikom.
Lauman nga masunod nga bulan ipaguwa man sang DTI ang updated nga bulletin sang SRP.
