Nalakip ang apat ka mga produkto sang Central Philippine University (CPU) sa lista sang topnotchers sa February 2025 Respiratory Therapists Licensure Examination.
Patas sa Rank 5 sanday Jose Miguel Santisteban Dumat-ol kag Jywelle Nae Leonero Nacional nga may 91.75 percent; samtang pareho naman nga Rank 6 sanday Di-Anne-Mei Quiñones Evangelista kag Charisse Joy Ponte Rubino nga nakakuha sang 91.50 percent.
Nalab-ot naman sang CPU ang 97.30% nga passing rate matapos 36 sa 37 ka examinees halin sa unibersidad ang nakapasar sa pasinawan.
Base sa gin-release sang Professional Regulation Commission (PRC) subong nga gab-i, kabug-usan nga 1,097 examinees ang nagkuha sang exam kag 853 ang nakapasar.
Nanguna sa topnotchers si Erma Mae Yongco Sanchez sang Cebu Doctors’ University (CDU) nga may percentage rating nga 94%.
Natalana pa nga i-anunsyo ang petsa kag venue sang oath-taking ceremony sang madinalag-on nga examinees.#
Photo: CPU page/FB
