Ginalantaw sang Alimodian Municipal Police Station ang duha ka mga anggulo sa pagtiro-patay sa isa ka mangunguma kag manubaligya sang utan sa Barangay Tabug, Alimodian, Iloilo.
Ang biktima amo sanday Rio Agudo, 46-anyos, isa ka mangunguma kag residente sang nasambit nga barangay; Roquita Cantomayor Dolar, 50-anyos, manugbaligya sang utan, kag residente sang Sitio Tabionan, Brgy. Bucari, Leon, Iloilo.
Sa interview sang Bombo Radyo kay Police Captain Marion Asparo, Officer in Charge sang Alimodian Municipal Police Station, iya ginpahayag nga santo sa panaysayon sang anak ni Agudo, ang iya amay ang nagabaligya sang mga baka kag karbaw.
Sang nagligad nga semana, nakabaligya pa sang baka ang biktima, kon sa diin masami may dala ang iya amay sang sling bag apang wala ini na-recover sa crime scene.
Suno kay Asparo, 2023 sang may natabo nga kontrobersyal nga iskandalo ang ginkaulamiran sang iya amay apang naalegro.
Para sa Alimodian PNP, ang anggulo sang personal grudge kag pagpangawat ang motibo sang mga suspek sa paghimo sang krimen.
Na-recover naman sang otoridad ang 9mm kag caliber 45 pistol nga armas luthang lakip na ang pila ka empty shells sang bala.
Nahibaluan nga magalawig kontani sang karbaw si Agudo kag hinali nga gintiro sang duha ka kalalakihan nga nakasuksok sang bonnet.
Samtang, nadalahig naman sa pagpangluthang si Dolar nga mamyesta lang man kontani sa amo nga barangay.
Nag-agum sang patal nga pilas sa ulo si Agudo kon sa diin, nadagdag pa ini sa pil-as kasunod sang pagpangluthang.
Pilas naman sa lawas ang naagum ni Dolar nga nagtuga man sang iya kamatayon.
Gindala pa ang duha sa Aleosan District Hospital apang gindeklarar nga dead-on-arrival.
