Gin-ako ni Punong Barangay Madonna Martin sang Barangay Concepcion, Iloilo City Proper nga siya mismo ang nagsugo nga magbutang sang karatula nga nakasab-it sa wala matapos nga multipurpose gym sang ila barangay.
Sa interview sang Bombo Radyo kay Martin, iya ginpahayag nga 2021 sang ginsugod tukod ang proyekto kon sa diin may tatlo ini ka panalgan.
Ginlaragway man sang pila ka mga residente ang proyekto nga daw kaangay nga bodega bangud wala matandog kag wala natapos-tapos.
Ginapahayag nga masobra duha na ka tuig nga wala nagamit ang multipurpose gym ilabi na kon may mga aktibidad kaangay sang sport events.
Gin-athag man sang natungdan nga intensyon lamang niya nga matutokan kag mahatagan sang igtalupangod ang proyekto ni Iloilo City Lone District Representative Julienne “Jam-jam” Baronda.
Suno kay Martin, nagabalor sang P40 million ang amo nga proyekto.
Nagalaum man ini nga masabat ang ila concern agud nga matapos na ang multipurpose hall.
