Nagpanindugan ang Office of the Building Official (OBO) nga indi sila ang rason sa pagka-delay sang multipurpose gym sa Barangay Concepcion, Iloilo City kag Barangay Katilingban, Molo.
Sa interview sang Bombo Radyo kay Engineer Mavi Gustilo, head sang Office of the Building Official, iya gindepensahan nga ang pondo sang proyekto sa Concepcion ang nahatag sang 2022 kon sa diin, 2022 man kag naimplementar.
Suno kay Gustilo, Abril 8, 2024 sang nagkuha ang kontraktor sang Concepcion Multipurpose Gym sang certificate of completion halin sa ila opisina.
Nag-apply para sa initial evaluation sang Mayo 2024, samtang nagkuha sang building permit application sang Hulyo 2024; buot silingon, nauna pa ang pagsugod patukod sang proyekto antes nakakuha sang permit.
Para kay Gustilo, wala sa ila ang delay kag ang problema, wala natapos ang proyekto.
Nahibaluan nga ginsuguran patukod ang Concepcion Multipurpose Gym sang 2021 kag nagabalor sang P40 million nga may tatlo ka panalgan.
Ginsugoran naman ang Katilingban Multipurpose Gym sang Dec 11, 2021 kag ginalauman nga matapos kuntani sa August 24, 2024, kun sa diin, magaserbe ini nga gym and evacuation center sang mga residente.
May pondo ang multipurpose building nga ₱24.6 million halin sa General Appropriation Act, sa diin, ang mga materyales nga gingamit ang gin-order pa halin sa pungsod Vietnam.
