Ginpaidalom na sa maid-id nga review sang Bureau of Design sang Department of Public Works and Highways (DPWH) Central Office ang engineering design sang Panay-Guimaras-Negros Bridge.
Sa interview sang Bombo Radyo kay Engineer Sanny Boy Oropel, Regional Director sang Department of Public Works and Highways Region 6, iya ginpahayag nga may yara na sang tentative schedule para sa loan agreement kon sa diin, ginlauman sa bulang sang Mayo.
Suno kay Oropel, kon wala naman sang makita nga deperensya sa desensyo ang National Economic and Development Authority (NEDA), magadirekta na sa procurement process.
Gin-athag man sini nga mahimo naman makapatuman sang civil works sa kataposan sang 2025 kag matapos sa Hunyo 2028.
Nahibaluan nga may duha ka sections ang proyekto, ini amo ang Section A nga Panay Guimaras Bridge nga may approximately 13.61 kilometers nga kalabaon.
Samtang, ang Section B naman amo ang Guimaras Negros Bridge nga may 19.47 kilometers ang kalabaon nga magakanektar sa isla sang Guimaras kag Negros.
Una na nga ginpirmahan ni Finance Secretary Ralph G. Recto ang kasugtanan kaupod kay South Korean Deputy Prime Minister Choi Sang-mok ang proyekto.
Ini ang may kabilugan nga gasto nga PHP 187.54 billion, sa diin pondohan sang Export-Import Bank of Korea (KEXIM) ang detalyado nga engineering design paagi sa kapin PHP 3.21 billion nga loan.
