Nagmandu si President Ferdinand Marcos Jr. sa pagtukod sang task force agud nga manguna sa paghatag sang ayuda sa mga pamilya nga apektado sang paglupok sang Bulkan Kanlaon sa Negros Island.
Kadungan ini sang situation briefing sa La Carlota, Negros Occidental kahapon, Pebrero 21.
“Kailangan na sigurong magbuo ng Task Force Kanlaon for the long-term recovery,” suno sa chief executive. “Ang problema talaga natin, wala tayong timetable. Nakaabang lang tayo sa bulkan. Pero pwede natin, we can already get started doon sa mga long term.”
Gamiton suno sa iya ang mga plano sang local government officials nga ginhatag sa ila kag ang magapanguna naman sa pagporma sang task force amo ang Office of Civil Defense (OCD).
Nag-istorya man ang presidente sa mga alcalde kag mga lideres sa probinsya kun paano masaylo ang mga residente nga nagapuyo sa sulod sang danger zone.
“Yung mga plano ng mga mayor na kukuha ng lupa, tapos diyan mag-rehabilitate, pero kailangan talaga ‘yan parang ililipat mo yung buong bayan. Hindi lang basta basta, basta kung saan mo ilalagay, basta may lupa diyan, pwede na ‘yan. Hindi ‘yan pwede. Maraming dapat consideration na kasama sa planning,” suno sa natungdan.
Disyembre 9, 2024 sang katapusan nga naglupok ang bulkan.
Nagpaandam man anay ang Philippine Institute of Volcanology and Seismology sang abrupt increase sa ground deformation sa bulkan nga mahimo magresulta sa gulpyada kag liwat nga paglupok.
