Nagpahanumdom ang Commission on Elections (COMELEC) nga subong nga adlaw ang deadline sang pag-apply para sa local absentee voting (LAV) para sa May 2025 midterm elections.
Matandaan nga Marso 10 gid ang orihinal nga katapusan nga adlaw sang filing, apang paagi sa Resolution 11120, gin-isol ini subong nga Marso 17 kasunod sang mga request nga nabaton sang poll body.
Suno sa Comelec, ang accomplished original LAV Form No. 01 kag original LAV Form No. 02 para sa local absentee voting ang dapat nga ipasa antes ukon tubtub subong lamang nga adlaw.
Ang deadline naman sa pagpasa sang mga pangalan sa qualified LAV voters halin sa Committee on LAV ang gin-reschedule sa April 27 halin sa April 21.
Ang LAV isa ka voting system nga nagatugot sa kuwalipikado nga mga indibidwal nga magboto antes pa man ang iban nga mga tawo.
Lakip diri ang may duty sa mismo adlaw sang eleksyon kaangay sang government officials and employees, members sang Armed Forces of the Philippines (AFP) kag Philippine National Police (PNP), amo man ang mga taga-media.
Sa LAV, gintalana ang voting period sa April 28 to 30 subong nga tuig. Patigayunon naman ang midterm election sa Mayo 12, 2025.#
