All set na ang Iloilo Police Provincial Office (IPPO) sa ila security preparations para sa Holy Week ukon Semana Santa.
Sa interview sang Bombo Radyo kay Police Major Rolando Araño, spokesperson sang Iloilo Police Provincial Office, iya ginpahayag nga gindihon na ang mga security protocols nga ipatuman sa probinsya agud mapasigurado ang kalinong samtang naga-obserbar sang Semana Santa.
Suno kay Araño, indi lamang obligasyon sang kapulisan ang pagpabilin sang masangkad nga seguridad, bangud lakip sa mga may responsibilidad amo ang tagsa ka indibidwal.
Bangud diri, nagpanugyan ang natungdan nga tsekyaron gid ang mga balay antes maghalin ukon maglakat agud nga indi manakawan ukon masudlan sang mga kawatan.
Ginpahayag man sini nga dapat nakandado ang pwertahan ilabi na ang mga bintana nga posible mangin alagyan sang kawatan.
Nagpanugyan man ini nga likawan ang pagdala sang dako nga kantidad sang kwarta kon nagaguwa kag may laktan.
Nagbilin man si Araño nga mag-inom sang madamo nga tubig agud malikawan nga ma-dehydrate subong nga tag-ilinit.
