Apisar gin-anunsyo ni United States President Donald Trump nga nagsugot na ang Cambodia kag ang Thailand sa ceasefire, nagpadayon sa gihapon ang linukpanay nga naangot sa away sang duha ka mga nasyon sa ila nga border.
Suno kay Bombo Rinse Bancal Galupo, Bombo International Correspondent sa Thailand, alas kuatro pa lang sa kaagahon subong nga adlaw, may na-report na nga pagsinigabong kag nagpadayon tubtub alas syete kaina sang aga.
Naga-guwa suno kay Galupo nga daw kaangay nga wala sang sinseridad sa ginpahayag nga ceasefire sa tunga sang duha ka mga pungsod.
Una na nga nagpasalamat ang magtimbang nga bahin kay Trump, kun sa diin ginbaton sang Cambodia ang request sini para sa ceasefire, samtang ginplastar naman sang Bangkok nga kinahanglan gid ang dayalogo.
Nahibaluan nga nagdangat na sa 33 ka mga soldado kag mga sibilyan ang napatay samtang linibo naman nga Thai kag Cambodian nationals ang nagtal-as sa ila mga balay halin sang nagsaka ang tensyon sang Hulyo 24.
Pareho nga gina-akusaran sang Thailand kag Cambodia ang isa kag isa nga amo ang una nga nag-umpisa sa pagpalupok sa ila nga border regions.
