Ginpahayag ni Senate President Francis “Chiz” Escudero nga natalana nga diskusyonan sang Senado sa Agosto 6, 2025 ang desisyon sang Korte Suprema nga nagdeklarar nga unconstitutional ang Articles of Impeachment batok kay Vice President Sara Duterte.
Suno kay Escudero, nahisugtan sang mga senador sa ila caucus nga tagaan anay sang malawig nga tion ang mga miyembro sang Senado agud matun-an sang husto ang 97-ka pahina nga ruling sang Korte Suprema.
Wala pa diri nalakip ang mga opinion sang anom ka mahistrado.
Madumduman nga sa boto nga 13-0, gindeklarar sang Korte Suprema nga unconstitutional ang impeachment complaint batok kay Duterte, base sa paglapas sang “one-year bar rule” nga ginatuhoy sa Article XI, Section 3, Paragraph 5 sang Konstitusyon.
Ginklaro man sang Korte Suprema nga wala nila ginadula ang sala ni Duterte sa mga alegasyon batok sa iya, apang suno sa ila sundon ang husto nga proseso kag pwedi lang liwat nga mag-file sang impeachment complaint umpisa Pebrero 6, 2026.
Sa pihak nga bahin, nagapreparar man ang House of Representatives sang motion for reconsideration sa desisyon sang SC, nga ginapamatud-an nila nga nagabase sa indi insakto nga findings kag naga-kontra sa opisyal nga record.
