Nagmando na si US President Donald Trump nga hulagon ang duha ka mga nuclear submarines sang Estados Unidos kag isaylo sa nagakaigo nga mga rehiyon kasunod sa mga pamahog halin kay former Russian President Dmitry Medvedev.

Wala na gin-mensyonar ni Trump kun sa diin ini nga mga rehiyon apang ginmuno niya nga preparasyon ini pananglitan mangin matuod ang mga tinaga sang anay presidente sang Russia.

Nag-ugat ini sa pagbawi ni Trump sang 50 ka adlaw nga deadline agud nga magpasugot ang Russia nga makig-negosyar na agud matapos ang gyera sa Ukraine.

Sa baylo nga 50 ka adlaw, ginhimo niya nga 10 tubtub 12 ka adlaw ang deadline; kag kun wala sang kasugtanan nga mahimo, nagpamahog ini sang sanctions.

Si Medvedev nga amo subong ang deputy chairman sang Russia Security Council ang nagsabat nga mahilig gid si Trump sa paghampang sa mga ultimatum.

Nagpahanumdom man ini sa US nga may yara ang Russia sang Soviet-era nuclear strike capabilities, kag nagsiling pa nga kada ultimatum nga ginahatag ang isa ka pamahog kag isa ka tikang pakadto sa gyera.

Sa una nga sabat ni Trump, ginhikayan pa sini si Medvedev kag gintawag nga palpak nga former president nga naga-pinsar nga presidente man siya gihapon subong.

Ginpaandaman man ni Trump si Medvedev nga mag-hinay-hinay bangud nagasulod siya sa isa ka delikado nga teritoryo.

Wala pa sang komento ang Russia sa latest nga mga statement sang presidente sang Estados Unidos sang Amerika.