Patay ang isa ka 75-anyos nga babaye samtang nasamaran naman ang iya manghod nga isa man ka senior citizen sang nasunog ang ila balay sa Barangay Oñate de Leon, Mandurriao, Iloilo City.
Base sa inisyal nga imbestigasyon, na-trap ang magulang nga babaye bangud nga napilpilan ini sang aparador samtang yara sa ikaduha nga panalgan sang balay.
Ang utod naman sini nga naga-edad sang 72-anyos ang nakaangkon sang mga paso sa iya nga ulo, butkon, kag tiil kag subong yara sa Western Visayas Medical Center. Natabuan nga yara ini sa una nga panalgan sang balay sang natabo ang sunog, apang nadugayan man nga makaguwa sa balay bangud sa iya edad.
Sa interview sang Bombo Radyo kay City Fire Marshal Melanie Habawel, iya ginpahayag nga nakaluwas man sa insidente ang mag-asawa nga yara man sa amo nga balay kag ang ila nga 12-anyos nga anak.
Napahibalo ang sunog tres minutos antes ang alas nueve kaina sang aga, kag natigayon nga mapalong 30 minutos makaligad ang alas nueve.
Base sa City Social Welfare and Development Office, magluwas sa balay nga totally burned, may isa man ka kaiping nga puluy-an nga nakaangkon sang partial nga halit rason nga duha tanan ka pamilya ang apektado.
Nagapadayon pa ang imbestigasyon sang Iloilo City Fire Station kun ano ang ginhalinan sang kalayo.#
(Photo: Iloilo City Disaster Risk Reduction and Management Office)
