Indi komporme si Iloilo City Councilor Romel Duron sa ginpresentar nga development sang Metro Pacific Iloilo Water (MPIW) may kaangtanan sa ila mga on-going nga proyekto sa syudad.
Sa interview sang Bombo Radyo kay Duron, iya ginpahayag nga wala gid siya na-satisfy sa presentasyon sang MPIW, bangud suno sa iya mas damo pa ang istorya kaysa sa aktwal nga tikang.
Pahayag pa sini, tuman ka hinay ang development sang ila mga proyekto sa diin sa subong, madamo na sang mga pumuluyo ang nagaantos bangud sa kulang kag mahina nga water supply.
Suno pa sa kagawad, wala siya kahibalo kun san-o siya pa ini mangin kuntento sa serbisyo sang MPIW nga ginkritiko niya bangud nagasalig pa sila Jalaur River project nga para sa iya, wala pa sang kasiguraduhan kun makahatag gid sang nagakaigo nga tubig sa syudad.
Ginklaro man ni Duron nga apisar pa may ginahimo nga mga tikang ang MPIW sa pag-ayo sang mga tubo kag pagpalapad sang water distribution system sa Iloilo City, nagapabilin sagihapon nga madamo ang palamangkutanon kag kabudlayan sa serbisyo sini.
Sa sulod sang anom ka tuig nga operasyon sang MPIW sa Iloilo, ginpahayag ni Duron nga mga 30% pa lang sang syudad ang ila maserbisyuhan.
Isa pa gid sa ginbuyagyag sang konsehal amo ang ginahimo sang MPIW nga paghatag sang water tanker sa mga negosyante, nga para sa iya daw ginabawi ang kakulangan sa serbisyo pinaagi sa mas mahal nga delivery kun ikumparar sa P20/cubic meter nga bayad sang mga regular nga konsumidor.
Ginapanawagan ni Duron sa MPIW nga seryosohon ang ila serbisyo kag tagaan atensyon ang matuod-tuod nga problema sang tubig sa Iloilo City.
