Ginhatagan sang Bangko Sentral ng Pilipinas (BSP) ang mga e-wallet sang 48 oras ukon duha ka adlaw agud nga pangkuhaon nila ang icons kag links sang mga online gambling platforms.
Ginpahayag ini ni BSP Deputy Governor Mamerto Tangonan kadungan sang hearing sang Senate Committee on Games and Amusement nga nagatutok sa online gambling.
Pahayag sini, sa Domingo, wala na dapat sang koneksyon ang mga e-wallet sa mga online gaming platforms.
“The Monetary Board of the [BSP] has approved our policy that we asked or we order, direct the BSP supervising institutions to take down and remove all icons and links redirecting to gambling sites,” suno kay Tangonan.
Ginpaathag sini nga naghatag man sila sang ligwa nga 48 oras agud nga may tyempo ang supervising institutions sang BSP nga makakas ang in-app links kag icons sa gambling sites. Isa pa suno sa iya, kinahanglan man sang customers ukon consumers nga ma-withdraw ang ila funds halin sa online gaming account kun mahibaluan nila nga ginapangkuha na ang links halin sa mobile payment applications kag websites.
Nagpaandam naman ang committee chair nga Sen. Erwin Tulfo nga i-cite in contempt niya ang mga opisyal sang BSP kun may makit-an pa siya nga link kag icon sang mga online gambling sa mga e-wallet providers pag-abot sang Domingo sang aga.
Nagdugang ini nga indi dapat paghimuon nga lahog ang gina-istoryahan sa Senate hearing bangud krisis na ang ginadiskusyunan kag dapat nga tapnaon.
“‘Huwag niyong biru-biruin ang komiteng ito. We have a problem, we have a crisis. Hindi ito basta-basta. When you say huling oras ng Saturday [ang deadline], sige pagbibigyan kita hanggang Sunday. ‘Pag Sunday morning meron pa ring mga games sa e-wallets, iko-contempt ka namin,” suno kay kay Tulfo.
Lakip sa naghatag sang response amo ang mobile wallets nga GCash kag Maya nga magasunod sila gilayon sa mandu sang BSP.
