Gin-aprubahan sang Manila Regional Trial Court Branch 12 ang petisyon sang kampo ni anay Negros Oriental Representative Arnolfo “Arnie” Teves Jr. nga maka-pyansa sa iya kaso nga pagpatay.
Ginpahayag sang abogado ni Teves nga si Ferdinand Topacio nga ang piyansa gin-set sang korte sa balor nga P120,000. Ini nga kaso ang may kaangtanan sa kamatayon ni Lester Bato, isa ka bodyguard ni Basay mayoralty candidate Cliff Cordova sang Mayo 2019.
Suno sa legal counsel, ang desisyon sang Manila Regional Trial Court nagapakita lang nga maluya ang mga kaso batok kay Teves bangud ini ang may lamod-pamulitika.
Apisar sini, indi pa gihapon makagwa sa presuhan ang anay kongresista bangud ginahulat pa ang duha pa ka desisyon sa petisyon sang piyansa sa iban nga kaso ni Teves.
Gin-akusahan ang anay mamalidha nga amo ang mastermind sang atake sang Marso 2023 nga nagresulta sa kamatayon ni anay Negros Oriental Governor Roel Degamo kag sang napulo pa ka iban nga mga indibidwal.
Nagapanghatag sang bulig si Degamo sa ila balay sa Pamplona sang nagsulod sa compound ang anum ka tawo nga may mga pusil kag nakasuksok sang military uniform, kag didto na ginhimo ang krimen. Ginpahalin man si Teves sa Kamara matapos siya magpakatig-a nga magpauli sa Pilipinas agud atubangon ang mga kaso.
Nahibaluan nga luwas sa sini nga kaso batok sa mga Degamo, naga-atubang man si Teves sang iban pa nga kaso sang pagpatay sa duha ka tawo sa Negros Oriental sang tuig 2019. Gindeklarar man siya kag ang iban pa sang Anti-Terrorism Council bilang mga terorista, bangud sa mga alegasyon sang pagpamatay kag pang-harass sa Negros Oriental.#
