Balik sa presuhan ang duha ka mga lalaki matapos nakuhaan sang masobra P3-million nga balor sang suspected shabu sa drug buy bust operation sa Barangay Salvacion Habog-Habog, Molo, Iloilo City.
Ini amo sanday alias Allan, 38, residente sang Brgy. Tabucan, Barotac Nuevo kag si alias Joebert, 55, residente sang Barangay Talibong Zarraga.
Sa interview sang Bombo Radyo kay Police Captain Glenn Soliman, team leader sang Regional Police Drug Enforcement Unit 6, iya ginpahayag nga 16 ka sachets sang iligal nga droga ang na-recover sang awtoridad nga nagabug-at sang 550 grams.
May yara ini sang standard drug price nga P3.74-million.
Suno kay Soliman, isa ka bulan ang ila nga monitoring kag surveillance antes naka-transaksyon sa duha kaina sang kaagahon.
Pareho nga na-preso sanday Allan kag Joebert sang 2020 kag 2021 bangud sa kaso nga kaangot man sa iligal nga droga, apang dungan nga nakaguwa sang nagligad lang nga 2024 bangud sa plea bargaining agreement.
Sa pagpangusisa sang pulis, naka-updanay sila sa presuhan kag ginapatihan nga didto nagsugod ang ila pagsalig sa isa kag isa.
Base pa sa imbestigasyon, diri sa Iloilo ang source sang illegal drugs kag gina-suplay nila ini sa syudad kag sa sa probinsya.
Natalana nga mangatubang ang duha sang kaso nga paglapas sang Republic Act 9165 ukon Comprehensive Dangerous Drugs Act.#
