Nagmandu ang Regional Disaster Risk Reduction and Management Council (RDRRMC) Region VI nga mag-implementar sang pre-emptive evacuation sa tanan nga high-risk areas bangud sang ginalantaw nga mangin epekto sang Super Typhoon “Uwan.”
Gin-address ang Memorandum No. 89, Series of 2025 sa tanan nga Provincial, City, kag Municipal DRRMCs sa Western Visayas.
Base sa order ni Office of Civil Defense Region 6 Director Raul Fernandez nga amo ang chairman sang Regional Council, dapat nga i-activate man ang tanan nga Emergency Operations Centers kag siguraduhon nga may yara sang maayo nga koordinasyon sa Regional DRRMC Operations Center.
Dapat man suno kay Fernandez nga handa ang mga evacuation centers kag dapat nga may napreparar nga bastante nga pagkaon, tubig, bulong, kag health supplies.
Ginapahanumdom man ang pagpaguwa sang mga timely nga warnings sa mga komunidad ilabi na sa vulnerable nga mga grupo.
Tuyo sini nga direktiba nga mapagamay ang casualties kag damage nga mahimo i-tuga sang super tyhoon.
Base sa forecast sang state weather bureau, magasulod si Uwan sa Philippine Area of Responsibility (PAR) karon sa gab-i ukon buwas sa kaagahon kag magadala sang pag-ulan kag makusog nga hangin sa madamo nga parte sang Pilipinas.
Ginalaragway man nga malapad ang sakop sang bagyo nga magasakop halin Batanes tubtub Bohol kag maka-apekto mangin sa areas nga malayo sa mata sang bagyo.
Ini ang ikaduha nga bagyo subong nga Nobyembre sunod kay Bagyo Tino nga nagbilin sang masobra 100 ka mga patay ilabi na sa Central Visayas.#
