Nagdangat na sa 83 ang nagkalamatay sa sunog sa high-rise apartment complex sa Hong Kong.
Magluwas sa mga kumpirmado nga patay, 79 pa ang ginabulong sa mga ospital.
Indi pa klaro kun pila pa ka mga indibidwal ang nagapabilin nga missing ukon na-trap, apang base sa impormasyon nga gin-release sang awtoridad, masobra pa sa 250 ang ginapangita.
Nahamtang ang Wang Fuk Court complex sa Tai Po district nga isa ka northern suburb malapit sa border sang Hong Kong sa mainland.
May walo ka 32-storey towers sa amo nga complex kun sa diin may 2,000 flats kag ginabanta nga 4,800 ka mga tawo ang nagapuyo.
Suno kay Virgo Pulmones Ceballos, international correspondent sa Hong Kong, tupaday lang ang mga building sa lugar, kag bangud sa tyempo subong sa Hong Kong, madasig nga naglamon ang kalayo.
Nagakahulog man ang mga debris kag scaffolding halin sa building gani nga mabudlay sa mga bumbero, magluwas pa nga mainit kag madulom sa lugar.
Wala pa sang nagaguwa nga impormasyon kun may mga Ilonggo nga yara man sa complex kag nabiktima sang sunog.
Sandig sa Overseas Workers Welfare Administration (OWWA) kag Department of Foreign Affairs (DFA), 23 ka mga Pilipino ang apektado sang sunog kun sa diin isa ang naka-confine sa ospital. #
(Peter Parks, AFP)
