Nagakabalaka ang Defense Secretary sang Pilipinas sa damlag nga military drills sang China sa palibot sang Taiwan, bangud nga mahimo ini makaguba sang kalinong kag stability sang rehiyon, ilabi na sa isla sang Taiwan nga gina-angkon sang Beijing nga iya teritoryo.
Suno kay Defense Secretary Gilbert Teodoro, ang mga tikang sang China kag sang ila coast guard nagadugang sang tensyon sa mahina nga geopolitical nga sitwasyon.
Naglunsar ang China sang mga missiles kag nagdeploy sang madamo nga fighter jets, navy ships, kag coast guard vessels sa palibot sang isla sang Taiwan sa nagliligad nga mga inadlaw antes magtakop ang tuig 2025.
Nahibaluan nga nagsugod ang tensyon sang 1949 sang nagtakop ang Chinese Civil War, ang Communist China nagkontrol sang mainland China samtang ang demokratiko nga Taiwan nagpadayon bilang hiwalay nga gobyerno, apang ginapahayag sang Beijing nga ini parte sang ila teritoryo kag nagbanta sang paggamit sang pwersa agud makuha ini.
Ginpahayag ni Teodoro nga ang amo nga mga aktibidad may dako nga epekto, indi lamang sa relasyon sang Taiwan kag China kundi pati man sa malapad nga Indo-Pacific nga komunidad, kag nagapahanumdom nga kinahanglan sundon ang international law.
Sa karun, wala pa sang opisyal nga deklarasyon halin sa Beijing nga natapos na ang ila military drills.
