Ginbawian sang kabuhi ang isa ka 21-anyos nga nursing student matapos nga nag-inom sang illegal ecstasy drugs sa General Santos City.
Suno sa imbestigasyon, nagkadto sa on the job (OJT) training sa Davao sang Pebrero 7-21 ang babaye nga biktima apang nakaeksperyensiya ini sang seizures kag hallucination gani nabalaka ang iya nga pamilya.
Gindul-ong ini pauli sang iya nobyo nga si Adrian.
Samtang yara sa ila balay, naglain ang batasan kag hulag sang dalaga kag masami nagasinggit kag ginamitlang ang tinaga nga ecstasy.
Matapos ang pila ka adlaw, nagluya ini tubtob nga napatay.
Duda sang iloy sang biktima, ginpainom ini sang ecstasy sang iya nobyo kag mga abyan.
Nangayo naman sang bulig sa otoridad ang pamilya agud mapaidalom sa autopsy ang biktima kag mahibaluan kun ano gid ang rason sa kamatayon sini.
