Ginkakibot ni Sandiganbayan Second Division Chairperson Justice Geraldine Faith Econg kun ngaa tuman ka damo ang balatian ni former Department of Public Works and Highways (DPWH) Secretary Manuel Bonoan.
Natabo ini kadungan sang arraignment sang kaso nga graft nanday Bonoan kag Senator Jose “Jinggoy” Ejercito Estrada kahapon sang hapon, Hunyo 4.
Sa impormasyon nga ginbasa sa Sandiganbayan, ginpahayag nga ang medical conditions ni Bonoan nagalakip sang acute coronary syndrome, heart failure, hypertension, Type 2 diabetes, CKD ukon chronic kidney disease, carcinoma, prostate cancer, kag spine pain.
“Bakit ang dami na?,” pamangkot ni Econg samtang ginaplastar ang amo nga impormasyon.
Suno sa mahistrado, magapangayo ang korte sang medical update halin sa Philippine National Police (PNP) kaangot sa kahimtangan sang akusado matapos nga gindala ini sa ospital kasunod sang pagguwa sang arrest warrant sa plunder case sini sa Sandiganbayan.
Suno sa abogado ni Bonoan, ang anay tiglikom sang DPWH ang nagapaidalom subong sa angiogram. Ini isa ka procedure nga nagagamit sang contrast dye kag X-ray imaging agud usisaon ang mga ugat sang dugo kag makita kon may posible nga bara ukon abnormalidad.
Wala man nakatambong ang 80-anyos ang former official sa arraignment para sa kaso nga plunder kag graft sa atubang sang Fifth Division.
Ginpahibalo sang iya abogado sa anti-graft court nga yara si Bonoan sa The Medical City samtang yara sa kustodiya sang Criminal Investigation and Detection Group (CIDG).
Pareho sanday Bonoan kag Estrada nga may arrest warrant bangud sang P573-million plunder and graft cases nga naangot sa flood control anomalies.
Suno sa mga piskal sang Ombudsman, may papel si Bonoan sa mga ginatawag nga “commitment fee” nga ginhatag kay Estrada nga ginapahayag nagpangayo sang kabug-usan nga pondo nga ₱855 milyon para sa mga proyekto sang flood control sa Bulacan.
Gin-akusahan man sang mga piskal si Bonoan nga may labot sa pagpili sang mga kontratista nga nakakuha sang nasambit nga mga proyekto.
Bangud nagdangat sa ₱855 milyon ang kabug-osan nga balor sang mga proyekto, ginpahayag sang mga state prosecutor nga nakabaton si Estrada sang 25 porsyento sini ukon indi magnubo sa ₱213.7 milyon.
Una na nga ginpanginwala nanday Bonoan kag Estrada ang mga alegasyon batok sa ila.#
