Nagtanyag sang bulig ang iban nga mga pungsod kasunod sang magnitude 7.8 nga linog nga nagtay-og sa Sarangani kag nabatyagan sa madamo nga parte sang Mindanao kahapon sang aga, Hunyo 8.
Suno kay Armed Forces of the Philippines (AFP) chief of staff General Romeo Brawner Jr., lakip diri amo ang ila military counterparts halin sa Estados Unidos sang Amerika, Japan, Indonesia, kag iban pa nga nasyon.
Nagpahayag sila suno kay Brawner nga mahimo nila mahatag ang assistance nga kinahanglan subong sang Pilipinas samtang nga padayon pa ang response efforts.
Sa bahin sang AFP, gin-deploy na ang tropa sa apektado nga mga lugar kasunod mismo sang mabaskog nga linog.
Nagabulig ang armadong kusog sa search, rescue, retrieval, relief, kag humanitarian operations.
Wala sang daku nga halit nga ginbilin ang linog sa military facilities kag wala man sang casualties sa mga personnel sini.
Sa pinakaulihi nga kumpirmasyon sang National Disaster Risk Reduction and Management Council (NDRRMRC), nagdangat na sa 35 ang numero sang nagkalamatay.
Sa data nga gin-release alas dies kagab-i, 31 ang gin-report nga casualties sa SOCCSKSARGEN ukon sa South-Central Mindanao samtang apat naman sa Davao region. Sa mga nagtaliwan sa SOCCSKSARGEN, 17 ang nagikan sa Sarangani, 12 sa General Santos City, kag duha sa South Cotabato.
Magluwas sa mga napatay, may yara pa sang missing nga mga indibidwal kag 134 ang naisip nga may injuries.#
