Nagapati ang Malacañang nga dapat nga imbestigaran ang pag-usmod sang mga establisyemento kasunod sang magnitude 7.8 nga linog sa Mindanao sang Lunes sang aga, Hunyo 8.
Suno kay Palace Press Officer Undersecretary Claire Castro, indi na kinahanglan nga mag-mandu pa si President Ferdinand Marcos, Jr. sang imbestigasyon, apang kinahanglan nga mahibaluan kun may yara bala sang kakulangan ukon tuga lamang ini sang force majeure.
Suno pa sa iya, nagahimo na sang inspeksyon kag mga assessment ang engineers kag concerned government agencies kaangay sang Department of Public Works and Highways (DPWH) agud nga ma-evaluate ang kadakuon kag mga rason sang damage.
Nahibaluan nga lakip sa nagkalaguba amo ang malapit 200 ka mga classroom sa 14 ka mga probinsya lakip na sa Soccsksargen, sa Zamboanga Peninsula, sa Northern Mindanao, sa Davao Region, kag sa Caraga.
Nag-deploy naman sang mga equipment kag personnel ang DPWH para sa rehabilitasyon sang naguba nga mga taytay kag dalan. Sa inisyal estimates suno kay DPWH Sec. Vince Dizon, nagdangat sa P1-billion ang balor sang damage.
Wala naman naghatag sang eksakto nga petsa si Castro, apang ginkumpirma sini nga may plano si President Marcos nga magbisita sa Mindanao.
Nauna na nga ginpasiguro sang presidente ang assistance sa apektado nga mga pamilya. Nagapadayon naman ang Department of Social Welfare and Development (DSWD) sa paghatag sang food packs kag iban pa nga relief aid lakip na sa isolated communities kag apektado sang pagtiphag sang duta.
As of press time, nagsaka na sa 38 ang numero sang patay sa Mindanao bangud sa linog; 478 ang napilasan; kag apat ang nagapabilin nga missing.#
