Sulod na ang five-time champions nga Brazil sa Round of 16 sang FIFA World Cup 2026 matapos nga nakahingagaw sang goal batok sa Japan sa stoppage time sa Round of 32.
Una nga naka-goal para sa underdogs si Kaishu Sano sa ika-29 pa lamang nga minuto sang matchup.
Sa second half pa nakabalos ang Brazil paagi kay Casemiro sa ika-56 nga minuto.
Halos ginapanan-aw na ang extra time bangud sa 1-1 nga score sang duha ka teams, apang sa ika-anum nga minuto sang stoppage time, naka-score liwat ang Brazil paagi kay Gabriel Martinelli matapos nga nabaton sini ang bola sa atubang mismo sang goal.
Ginpatigayon ang hampang sang duha ka teams sa NRG Stadium sa Houston, Texas umpisa 1:00 kag nagtakop 3:00 subong nga kaagahon – Philippine Time.
Sunod nga atubangon sang Brazil ang Ivory Coast ukon ang Norway sa New York para sa spot sa quarterfinals; samtang eliminated naman ang Japanese team sa tournament.
Matandaan nga sa una nga knockout match kahapon sa tunga sang Canada kag South Africa, nakasulod man ang Canadians sa Round of 16 paagi sa goal sa 90+2 sa stoppage time.
