Ginbasura sang Department of Justice (DOJ) ang panumbungon batok kay Vice President Sara Duterte nga inciting to sedition.
Ini may kaangtanan gihapon sa iya pahayag nga kun may matabo nga malain sa iya, may nasugo na siya nga isa ka tawo nga patyon sanday President Ferdinand Marcos Jr., First Lady Liza Araneta-Marcos kag anay House Speaker Martin Romualdez.
Suno kay DOJ spokesperson Atty. Polo Martinez, mataas ang kinahanglanon nga lebel sang ebidensya agud mapasaka ang kaso nga inciting to sedition sa korte.
Siling ni Martinez, gin-ibasura ang reklamo bangud wala nakit-an sang panel sang mga prosecutor ang prima facie evidence nga may reasonable certainty ukon kasiguruhan nga magresulta ini sa conviction.
“It was dismissed for the sole reason that the panel of prosecutors did not find prima facie evidence with reasonable certainty of conviction,” suno kay Martinez.
Ini ang rason kun ngaa grave threat lamang nga kaso ang gin-file sa Quezon City Regional Trial Court kahapon, Agusto 11.
Matandaan nga sang Pebrero 2025, nagrekomendar ang National Bureau of Investigation (NBI) nga mapasaka ang mga reklamo nga grave threats kag inciting to sedition batok kay Duterte.
Ginarepaso pa sang DOJ ang amo mga reklamo sang nagsugod ang impeachment trial sang Bise Presidente. Didto sa trial, nagtestigo si NBI Director Melvin Matibag kag nagsiling nga ginlantaw sang bureau ang posibilidad sang isa ka conspiracy nga nagalakip kay Duterte kag Davao City Mayor Sebastian “Baste” Duterte.#
 ang panumbungon batok kay Vice President Sara Duterte nga inciting to sedition.){kind=link}