Na-diagnose man nga may cancer ang utod ni Pope Leo XIV nga si Louis Prevost.
Ini ang ginkumpirma sang iya asawa nga si Deborah Prevost matapos nga ginsapubliko sang Vatican nga natukiban nga may lung cancer ang 71-anyos nga Santo Papa kasunod sang pagpaidalom sini sa surgery sa iya baga.
Suno kay Deborah, multiple myeloma ukon isa ka sahi sang blood cancer ang ginasuprer sang magulang ni Pope Leo apang indi klaro kun sa ano na ini nga stage.
Ginabulong ini subong paagi sa clinical trial sa isa ka ospital sa Florida, United States.
Una ini nga na-diagnose nga may cancer sang 2017 kag nagpaidalom sa pagbulong sang 2019 apang nagbalik ang balatian matapos ini liwat nga naglala tatlo ka bulan na ang nagligad.
Ginkumpirmar man ni Louis nga nagapaidalom siya sa CAR-T cell therapy nga isa ka sahi sang treatment nga ginabag-o ang immune cells sang pasyente agud makilala kag maguba sini ang mga cancer cell.
Ginpahayag ni Deborah nga madamo ang gina-atubang sang ila pamilya sa subong apang padayon sila nga nagalaum kag nagapangamuyo para sa maayo nga kahimtangan sang mag-utod.
Nahibaluan nga nagpaidalom si Pope Leo XIV sa 90 minutos nga operasyon sa Gemelli Hospital sa Roma sini nga Martes matapos makita ang bukol sa iya baga sa isa ka medical check-up.
Didto kag na-diagnose ang Pope nga may lung adenocarcinoma nga isa ka common form sang lung cancer.
Ginkumpirmar sang Vatican nga madinalag-on ang operasyon kag wala sang komplikasyon. Padayon nga nagapahuway ang Pope kag magapabilin siya sa ospital sa sulod sang isa ka semana para sa recovery sa operasyon.#
