Wala sang pagtaas sa presyo sang mga nagapanguna nga balaklon sa pungsod tubtob sa Disyembre 31, 2026.
Ini matapos naghatag sang commitment ang mga manufacturer sa Department of Trade and Industry (DTI) nga ipabilin lamang ang presyo subong sa pihak sang pagsaka sang gasto sa gatong kag raw materials.
Suno kay Trade Secretary Cristina Roque, sakop sang kasugtanan ang tanan nga basic necessities and prime commodities ukon BNPCs nga nalakip sa listahan sang DTI.
Lakip sa mga produkto nga ginalauman nga wala sang saka sa presyo amo ang sardinas, gatas, kape, tinapay, instant noodles, asin, detergent, bottled water, kandila, mga delata kaangay sang luncheon meat, meat loaf, corned beef, beef loaf, amo man ang langgaw, patis (fish sauce), soy sauce, toilet soap, kag baterya.
Suno kay Roque, ginpasiguro man sang mga manufacturer nga bastante ang suplay sang sini nga mga produkto, gani wala sang rason nga mag-panic ukon magbakal sang sobra ang mga konsumidor agud magkinot sang ila suplay.
Samtang, magapatigayon pa ang DTI sang separado nga meeting upod sa mga manufacturer agud istoryahan ang presyo sang mga produkto nga ginagamit sa paghanda sang Noche Buena.
Ginpahayag ni Roque nga luyag man sang ahensya nga mapabilin nga wala sang pagtaas ang presyo sang sini nga mga produkto, apang wala pa siya makahatag sang kasiguruhan tubtob nga wala pa niya ini maistoryahan upod sa mga manufacturer.
May kaangtanan naman sa posible nga epekto sang El Niño, ginpahayag sang tiglikom nga mahimo makakuha sang loan ang mga mangunguma paagi sa yara na nga mga loan facility sang Small Business Corporation, ang financing arm sang DTI.#
Photo by Mark Balmores
