Gin-athag sang Iloilo Provincial Government sa mga pumuluyo nga luyag magreklamo parte sa nagkalain-lain nga problema sa probinsya nga magpasaka sang pormal nga reklamo paagi sa pag-execute sang affidavit of complaint, imbes nga magpahayag lamang sang ila sentimento sa social media.
Sa interview sang Bombo Radyo kay Governor Arthur “Toto” Defensor, iya ginpahayag nga bisan madamo na sang mga reklamo nga ginapalab-ot paagi sa social media, wala pa sa mga ini ang nakaagi nga magsumiter sang pormal nga reklamo sa provincial government.
Madumduman nga nag-sunod-sunod ang mga alegasyon sang mga pasyente nga ginapahayag may yara sang kapaltahan kag kapabayaan sa pila ka mga hospital sa probinsya sang Iloilo.
Bangud sini, gin-athag ni Defensor nga kinahanglan ang formal complaint bilang basehan sang probinsya sa pagpatigayon sang imbestigasyon kag pag-usisa sa mga reklamo.
Dugang pa sang gobernador, mahimo magpalapit sa mga opisyales sang probinsya ang mga pumuluyo nga luyag magpasaka sang reklamo agud mabuligan sila.
