Ginklaro sang Local Economic Enterprise Office (LEEO) nga wala sang ginakuha nga ginansya halin sa electricity bill sang mga manugbaligya sa Jaro Public Market bangud may tagsa-tagsa sila nga submeter nga amo ang basehan sa reading sang ila aktuwal nga konsumo.
Ini kaangot sa reklamo sang pila ka vendors sa amo nga merkado nga nagabayad sila sang minimum nga P760 nga bulanan nga electricity bill bisan manubo lamang ang konsumo sang ila mga stall.
Suno kay LEEO Head Maricel Mabaquiao, ang reading sang submeter sang kada vendor amo ang ginabasehan sang electrician sa pag-compute sang ila balayran, nga nagasunod sa billing kag charges nga ginahatag sang MORE Power.
Paathag ni Mabaquiao, kun ano ang reading kag balayran nga ginahatag sang MORE Power, amo man ang gina-compute kag ginasukot sang LEEO sa mga vendors, gani wala sang ginadugang nga patong para makaginansya ang opisina.
Dugang pa niya, may separado man nga konsumo para sa common areas sang merkado, kaangay sang mga suga sa hallway, nga nagakinahanglan sang administrative charges.
Samtang, may yara sang minimum consumption nga 28 kilowatt-hours kada bulan nga ginapatuman sang MORE Power, apang nagadepende gihapon ang aktuwal nga balayran sa billing sang power distributor.
Ginpahayag man ni Mabaquiao nga may yara sang 25 percent surcharge kag 2 percent interest nga ginadugang sa balayran sang vendors nga ma-late sa pagbayad.
