ILOILO CITY – Ginbalewala lamang ni anay Presidente Rodrigo Duterte ang pinakaulihi nga desisyon sang International Criminal Court nga nagbasura sang apelar sang Pilipinas may kaangtanan sa iya drug war.
Suno sa iya legal counsel nga si Harry Roque, ginapanindugan sa gihapon ni Duterte nga bilang isa ka independent kag sovereign state, ang mga korte lamang sa Pilipinas ang makapamat-ud sa anuman nga krimen nga nakomiter sa sulod sang teritoryo sang Pilipinas.
Subong nga adlaw, gin-anunsiyo ni Appeals Chamber Presiding Judge Marc Perrin de Brichambaut ang desisyon sang The Hague-based court sa apelar sang pungsod.
Ginpahayag man ni Duterte nga ang Pilipinas ang naggwa na sa International Criminal Court sang 2019, isa ka tuig matapos nagsugod ang preliminary investigation sa drug war nga nagpatay sang linibo ka mga tawo.
Sang 2021, pormal nga ginlunsyar sang international court ang inquiry kag gin-suspend pagkaligad sang duha ka bulan matapos nga ginpahayag sang Manila nga gina-imbestigaran liwat ang pila ka gatos nga kaso sang drug operations nga nagresulta sa kamatayon sang madamo nga tawo sa kamot sang kapulisan, hitmen kag mga vigilante.
Nagdangat sa 6,181 ka mga tawo ang ginpamatay sa masobra 200,000 anti-drug operations apang base sa estimate sang International Criminal Court, ang death toll ang nagadangat sa 12,000 tubtob 30,000.
