CAPIZ – Nagtuga sang panic kag kahangawa sa isa ka taga-Capiz nga pasyente ang una nga balita nga siya ang rason sang pagpositibo sang walo ka doktor sang St. Paul’s Hospital of Iloilo sa coronavirus disease 2019 (COVID-19).
Sa interview sang Bombo Radyo kay Capiz Provincial Health Officer Dr. Lea del Rosario, iya ginpahayag nga gindala ang amo nga pasyente sa St. Paul’s Hospital sang tinalikdan nga Hunyo 19.
Tuyo kuntani sang pasyente nga magpalimpyo sang iya pilas apang sang ginpaidalom ini sa mandatory rapid test sang amo nga ospital, nadisbkurehan nga positibo ini sa virus.
Suno kay Del Rosario, masunod nga ginpaidalom ang pasyente sa confirmatory test apang nag-negatibo na ang resulta.
Mismo ang Capiz Provincial Health Office suno sa opisyal ang nakibot man sang ginpahayag nga ang amo Capizeño ang ginasuspetsuhan nga carrier sang respiratory illness.
Gindepensahan man ni Del Rosario ang pasyente kag ginpahayag nga wala ini sang close contact sa COVID-19 suspect kag wala man sang travel history sa lugar nga may kaso sang COVID-19.
Sa subong, nagapaidalom pa sa quarantine ang amo nga pasyente kag ginahulat na lang ang resulta sang iya ikaduha nga reverse trabscription polymerase chain reaction (RT-PCR) test.
