Posible nga magguwa na subong nga semana ang arrest warrant batok sa kontrobersyal nga bilyonaryo nga kontraktor nga si Sarah Discaya.
“Inaasahan din natin na lalabas ang warrant of arrest ni Sarah Discaya nitong linggong ito, at hindi na rin magtatagal ang pag-aresto sa kaniya,” suno kay President Ferdinand “Bongbong” Marcos, Jr. sa iya nga video report subong nga aga, Disyembre 9.
Dugang sini, “magpapatuloy ang imbestigasyon, magpapatuloy ang pagpapanagot, at titiyakin ng pamahalaan na ang pera ng bayan ay maibabalik sa taumbayan.”
Matandaan nga sang Byernes, nagpasaka na ang Ombudsman sang kaso nga graft kag malversation batok kay Discaya kag walo ka mga opisyal sang Department of Public Works and Highways (DPWH) bangud sang P96.5-million flood control project sa Davao Occidental nga nabayaran na apang wala man gintukod.
Suno kay Assistant Ombudsman Mico Clavano, gin-file ang kaso sa Regional Trial Court sang Digos City, nga isa sa special courts nga gin-designar sang Supreme Court nga magpatigayon sang trial kaangot sa infrastructure corruption-related cases.
Pareho sang kaso nga ginpasaka batok sa resigned lawmaker nga si Zaldy Co, nagrekomendar man ang Ombudsman nga wala sang pyansa para sa malversation case ni Discaya.
Ang bana naman ni Sarah nga si Pacifico “Curlee” Discaya II ang nagapabilin sa Senate detention matapos ini gin-cite in contempt bangud sang pagbinutig kag paghatag sang indi consistent nga mga pahayag sa mga hearing kaagot sa flood control scandal.
Una na nga nagpahayag si Marcos nga nagmandu na ini sa Department of the Interior and Local Government kag sa Philippine National Police (PNP) nga i-monitor si Discaya agud nga madakpan gilayon pananglitan magguwa na ang arrest warrant.
Ginlapta naman sang PNP ang ila nga intelligence units kag tracker teams agud nga mahibaluan kun sa diin ang babaye nga Discaya kag ang iban pa nga na-implicate sa alleged ghost flood control project.#
