Temporaryo nga suspendihon ang tanan nga byahe sang sakayang pandagat via Dumangas, Iloilo-Negros Island and vice versa.
Ini ang magaumpisa subong nga adlaw, Mayo 25 tubtob Mayo 31, 2021.
Sa interview sang Bombo Radyo kay Commander Edison Diaz, pinuno sang Philippine Coast Guard- Iloilo, iya ginpahayag nga ini ang isa sa pamaagi nga indi na madugangan ang nagataas nga kaso sang COVID-19 sa syudad kag probinsya sang Iloilo.
Suno kay Diaz, indi pagpahanugutan ang tanan nga makabyahe via Dumangas, Iloilo-Negros Island and vice versa, magluwas sa mga masunod:
- medical healthcare personnel;
- uniform armed service personnel; kag
- humanitarian service personnel
Ang tanan nga Authorized Persons Outside Residence nga wala nalakip sa nasambit nga exemption, indi sa gihapon pagpahanugutan nga makabyahe.
Subject for extension sa gihapon ang pagsuspende sang mga byahe, depende sa sitwasyon kag rekomendasyon sang Iloilo City Government kag Iloilo Provincial Government.
Ginpahayag ni Diaz, nga nagapadayon naman ang pag-abot sang mga vessel nagikan sa iban nga rehiyon magluwas lamang sa Iloilo Province kag Negros Island kasunod sang ginpatuman nga temporary border restrictions.
