ILOILO CITY- Ginsabat sang caregiver sang negosyante nga si Vicente ‘Itik’ Espinosa ang alegasyon sang collector nga ginapahayag ginsakit sa sulod mismo sang hospital room.
Sa interview sang Bombo Radyo kay Cherry Ann Tupas sang Brgy. San Antonio, Ajuy, Iloilo kag caregiver ni Espinosa, iya ginpahayag nga nakita niya mismo kun ano ang natabo sa sulod sang kwarto kun sa diin yara si Ruth Gabion.
Suno kay Tupas, nag-abot si Gabion sa hospital agud maglisensya kun tani kay Espinosa nga indi anay makabayad sang 100 ka sako sang bugas nga iya ginhulam kag ginpautang apang ini ang gintunaan sang kaakig sang negosyante.
Ginpahayag ni Tupas nga sang nagsulod sa banyo si Espinosa agud mangihi, nakita sang iya upod nga si alyas Kalbo nga ginasulod ni Gabion ang relo ni Espinosa sa iya bulsa.
Diri na kag nag-umpisa ang indi pag-itindihanay tubtub nga naglab-ot sa pisikalanay samtang ginpanginwala naman ni Gabion ang akusasyon batok sa iya.
Sa interview sang Bombo Radyo kay Gabion, iya ginpahayag nga indi matuod nga nag-utang siya sang 100 ka sako sang bugas.
Suno kay Gabion, indi man matuod nga gintinghuaan niya nga kawaton ang gamit ni Espinosa kag indi man matuod nga nangin bayolente siya bangud sa pagkamatuod siya ang ginsakit sang negosyante.
