Ginkumpirma sang National Bureau of Investigation (NBI) nga may na-recover nga cash kag importante nga mga dokumento halin sa condominium unit ni resigned Ako Bicol Party-List Representative Zaldy Co sa Bonifacio Global City sa Taguig.
Kagab-i, Disyembre 11, sang ginpatigayon sang NBI-Organized and Transnational Criminal Division (OTCD) ang search operation sa unit sang anay kongresista.
Wala pa ginpahibalo ni NBI Spokesperson Atty. Palmer Mallari kon ano ang unod sang amo nga mga dokumento, apang nagpahayag siya nga makabulig ini sa imbestigasyon sa maanomalya nga flood control projects.
“Somehow we will be able to cross-reference these documents to those we already have,” suno kay Mallari.
“At the same time, pwe-pwede ikumpara doon sa mga statements earlier given by witnesses who came forward and offered testimonies. Para malaman natin at magagamit ba ito sa ating pag fa-file ng kaso,” dugang sini.
Pahayag sini, igabalik ang inventory sheet sa korte nga nagpaguwa sang search warrant para nga mapahibalo nga may affirmative result ang operasyon.
“And from there, we would have to wait for the disposition of the court,” dugang niya.
Una naman nga ginkumpirma sang NBI nga nag-request na sila sang red notice sa Interpol para sa anay kongresista. Kun aprubahan na, iga-pahibalo sang Interpol ang mga pungsod nga miyembro sini kaangot sa warrant of arrest batok kay Co.
Gindeklarar man siya sang Sandiganbayan bilang “fugitive from justice” kag ginmandu ang kanselasyon sang iya nga passport bangud sa kaso nga malversation kag graft kasunod sang P289 million substandard road dike project sa Oriental Mindoro.
Sa bahin sang Department of the Interior and Local Government (DILG), nagapakig-angot na ini sa Portugal bangud ginasuspetsahan nga may yara sang Portuguese passport ang anay kongresista.#
