ILOILO CITY- Sugodan na subong nga adlaw sang City Environment and Natural Resources Office (CENRO) ang pagkutkot sang mga bubon sa syudad sang Iloilo agud temporaryo nga makuhaan sang supply sang tubig sa tunga sang El Niño.
Sa interview sang Bombo Radyo kay Engineer Niel Ravena, pinuno sang nasambit nga opisina, iya ginpahayag nga magapadulong sila subong nga adlaw sa Barangay Dungon, Jaro, Iloilo City agud magpatigayon sang drilling activity.
Suno kay Ravena, nagakulang na ang water sources nga ginakuhaan sang ila talatapan para sa ila nursery ilabi na ang ginagamit sa pagbunyag sa mga tanum sa palibot sang syudad.
Ginpahayag man sang natungdan nga padayon nga nagalibot ang kapin 100 ka mga tinawo sang opisina agud magpatigayon sang survey may kaangtanan sang ginakuhaan sang water supply sang mga residente.
Nahibaluan nga nagpabutyag na si Iloilo City Mayor Jerry Treñas nga kun indi gilayon matatapan ang problema, mapilitan ini nga magdeklara sang state of calamity sa syudad.
