Nagpahayag sang iya reaksyon si Engr. Nilo Jardeleza, Chairman sang Infrastructure Development Committee sang Regional Development Council (RDC) VI, matapos ang panawagan ni President Ferdinand Marcos Jr. sa pag-audit kag imbestigasyon sa mga flood control projects nga ginbanggit sa iya SONA.
Sa interview sang Bombo Radyo kay Jardeleza, iya ginpahayag nga nakita niya na sang temprano pa ang problema sa flood control kag dapat ini tutukan indi lang sa konstruksyon kundi pati sa maintenance kag operasyon.
Ginpunto niya nga indi gid mapunggan ang baha, apang pwede ini nga ma-mitigate, paagi sa husto nga pondo kag atensyon sa mga proyekto.
Gindugang pa ni Jardeleza nga may problema sa pag-realign sang mga suba, kun sa diin kun temprano pa lang ginhimo na ang adjustments, mas barato ang magasto kag ma-limit lang ang damages kag mas mabakod ang mga naubra nga proyekto.
Apang ginbuyagyag man niya nga kulang ang pondo nga ginahatag bisan may ara na sang mga standard design halin sa central office.
Ginpanugyan niya nga dapat usisaon sang implementing agencies ang applicability sang design base sa aktwal nga kondisyon sang lugar, suno sa 2000 memorandum ni Secretary Simeon Datumanong.
Ginklaro ni Jardeleza nga may madamo nga pamaagi nga makabulig ang gobyerno sa pagtukod sang mas mabakod nga flood control structures, apang kinahanglan nga siguraduhon ang kalidad agud indi mauyang ang pondo.
Ginpaandam man niya ang publiko nga ang pagbaha isa ka seryoso nga problema nga dako ang halit sa tanan nga aspeto sang kabuhi.
Ginaengganyo man niya ang mga pumuluyo nga mangin mabinantayon kag magreklamo kun may mga proyekto nga wala sang maayo nga epekto, kag magpartisipar sa mga polisa para sa kaayuhan sang tanan.
