Gin-anunsyo sang China nga nagtakop sang madinalag-on ang negosasyon sini para sa updated version sang China-ASEAN Free Trade Agreement (FTA).
Ginkumpirma ini ni Chinese Ambassador to the Philippines Huang Xilian sa tunga sang padayon nga trade war sa tunga sang Beijing kag Estados Unidos sang Amerika bangud sa taripa.
Ang bag-o nga agreement nga kilala nga version 3.0 amo ang magapabaskog sang trade relations sa tunga sang China kag member countries sang Association of Southeast Asian Nations (ASEAN).
Positibo si Huang nga malapit na lang ini mapirmahan para sa free trade kag masigurado ang patas kag bukas nga international economics.
Ginpadayaw man ni Huang nga ang ASEAN ang largest trading partner sang China, kag ang China man ang pinakadaku nga trading partner sang tanan nga ASEAN member states.
Nahibaluan nga ang China ang pinaka-naiguan sang taripa nga gin-anunsyo ni US President Donald Trump nga naglab-ot sa 145%.Nagbalos naman ang Beijing sang 125% levies sa American goods nga pasulod naman sa China.
