Ginaduso ni Manila 3rd Dirstrict Representative Joel Chua ang House Bill 5862 ukon Public Nursing Home Act of 2025 para sa mga senior citizen sa kada siudad kag kabanwahan sa Pilipinas.
Suno sa kongresista, masarangan gid nga itukod ang nasambit nga public nursing homes sa tagsa ka mga lugar sa sulod lamang sang lima ka tuig.
Ini kasunod sang datos nga madamo nga mga tigulang ang ginabayaan sang ila pamilya, nagaisahanon na lang sa kabuhi, kag wala na sang pamilya nga luyag pa nga bantayan ang ila katigulangan.
Ginpakigbahin man ni Chua nga kun matigayon nga mapasar ang nasambit nga hagna, kinahanglan nga butangan ang mga ini sang insakto nga kwarto ang igatukod nga pasilidad, basic utilities, kuryente, tubig, qualified staff, basic health kag recreational facilities, amo man ang ila administrative office.
Sa idalom man sini, ginarekomenda nga magahatag sang technical assistance kag supervision ang Department of Social Welfare and Development (DSWD) kag National Commission of Senior Citizens (NCSC), samtang ang magadumala naman ang local Office of Senior Citizens Affairs kag Social Welfare Office.
