ILOILO CITY- Ginpanugyanan ni Iloilo City Councilor Ely Estante ang tanan nga mga customers nga nagakaon sa mga food establishments nga i-report ukon ipa-blotter ang mga kalan-an nga wala nagahatag sang libre nga service water.
Ini may kaangtanan sa Regulation Ordinance 2018-051 or the Free Potable Service Water Ordinance of Iloilo City nga suno sa konsehal, daw wala na ginasunod sang mga food establishments.
Sa interview sang Bombo Radyo kay Estante nga amo ang principal author sang lima ka tuig na nga ordinansa nga napasar sang 2018,iya ginpahayag nga may nagahulat nga penalidad sa mga violators- warning sa first offense, P3,000 ng multa sa 2nd offense, kag P5,000 kag suspension sang business permit kag pagpasirado sang establishment sa third offense.
Suno pa sa konsehal, sa pagkamatuod,base sa iya obserbasyon, wala man nagatuman ang mga kalan- an sa Section 4.2 sang ordinansa nga naga -require sang signage nga nagasiling “Free Service Water” nga dapat itapik sa sulod sang premises sang establishment.
