ILOILO CITY – Istrikto ang mga pagsulundan sa Brgy. Calaparan, Arevalo, Iloilo City matapos nagpositibo sa coronavirus disease 2019 (COVID-19) ang isa ka Locally Stranded Individual nga yara sa amo nga lugar.
Matandaan nga naalarma ang halos bug-os nga barangay sang nahibaluan nga ang iloy sang nasambit nga COVID-19 positive ang naglibot pa sa lugar, nagpanukot sang utang kag nagtambong pa sa prayer meeting.
Sa interview sang Bombo Radyo kay Tony Ituriaga, isa sa mga barangay kagawad, iya ginpahayag nga temporaryo nga ginpa-untat ang pagtililipon sang mga pumuluyo kag gindumilian man ang pagtinir sa mga internet cafe.
May curfew man sa mga tiangge nga nagaumpisa 8:00 sa gab-i.
Suno pa sa opisyal, naga-overtime ang mga barangay officials agud hugot nga ma-monitor ang mga pumuluyo kag agud malikawan ang posible nga transmission sang virus.
Sa subong, 16 na ka mga pumuluyo ang ginkuhaan sang swab sample para sa COVID-19 test matapos nakaangkon sang close contact sa high-risk nga iloy sang COVID-19 positive.
Panugyan ni Ituriaga sa mga pumuluyo, magpabilin lang anay sa balay kag magtuman sang health protocols ilabi na samtang wala pa nakagwa ang resulta sang test.
