Mas ginhugtan sang gobyerno sang Saudi Arabia ang mga lihok nga ila ginapatigayon batok sa makamamatay nga virus nga COVID-19.
Suno kay Bombo International Jean Costas Pio, direkta sa Saudi Arabia sugod alas siete palang sang gab-i wala na sang makit-an nga nagaliho-liho sa gwa tubtob alas siete sang aga.
Ini bangud posible nga magapangatubang sang nagaka-igo nga silot ang sinuman nga madakpan nga nagalapas sa mga pagsulundan ilabi na sa ginpatuman nga curfew sa diin may yara sang penalidad nga P5,000 kag posible pa nga mapreso.
Dugang sang natungdan, wala sang ginhatag nga quarantine pass sa ila ang gobyerno apang ginpanugyanan sila nga kun mahimo likawan ang paggwa sa ila nga mga panimalay kun indi man lang importante.
Nahibaluan nga ginpasarado naman ang mga establisyemento komersyal sa Saudi Arabia kag ang nagapabilin nalang nga nakabukas amo ang mga nagabaligya sang essential goods kaangay sang pagkaon kag bulong bangud man sa ginpatuman nga lockdown.
Gindumilian naman ang pagpadulong sa mga Mecca ilabi na ang mga dumuluong bangud man sa padayon nga pagsaka sang kaso sang COVID-19.
Sa subong nagdangat na sa 2,163 ang kabilugan nga numero sang positibo nga kaso sang COVID-19 sa Saudi Arabia sa diin 521 diri ang nakarecover na kag 38 naman ang nagkalamatay.
