ILOILO CITY – Ginkumpirma sang La Paz Police station nga isa ka Tokhang surrenderee sang 2017 ang isa ka dental technician ukon manughimo sang pustiso nga ginluthang-patay sa Lopez Jaena Norte, La Paz, Iloilo subong nga aga.
Ang biktima amo si Angelito Doldoco Yee, mas kilala nga ‘Bosyok”, 53 anyos, kasado kag may duha ka mga kabataan.
Sa interview sang Bombo Radyo kay Police Corporal Marell Tamayo, imbestigador sang La Paz Police Station, iya ginpahayag nga ini ang santu sa ila inisyal nga imbestigasyon apang indi pa bug-os nga matumod kon ini gid bala ang rason sa iya kamatayon.
Suno kay Tamayo, sugod sang nagsungka ang biktima sa otoridad, wala man ini madakpan sa mga drug operations.
Dugang ni Tamayo, nakuha sa balay sang biktima ang 10 ka open plastic sachet nga may residue sang suspected shabu, (2) ka heat sealed plastic sachet nga naga-unod sang white crystalline substance nga ginapatihan shabu, (1) ka metallic foil, (1) ka tooter kag (3) ka lighter.
Magluwas sini, narekober man ang (9) ka fired cartridge kag (4) ka deform fired bullet sang wala pa mahibaluan nga armas.
Nahibaluan nga nag-angkon ang biktima sang onse tanan ka mga pilas sa iya dughan.
Sa interview naman sang Bombo Radyo sa kasilingan sang biktima nga si John Jordan, iya ginpahayag nga antes mapatay ang biktima, nakabati pa sila sang paghibi sini nga daw kaangay nga nagapakitluoy.
Sa umpisa, suno kay Jordan, ila ginhuna-huna nga ini ang tuga sang kuring ukon ido.
Matapos sini, nakabati na sila sang sunod-sunod nga arak sang armas luthang kag ginabanta anom ini ka lupok.
Santo naman sa iya pagpangusisa sa palibot, may naga-surveillance na nga mga lalaki sa lugar pila ka adlaw antes ang insidente.
Dugang ni Jordan, mabuot ang biktima kag wala naman sang nakaaway sa ila lugar nga mahimo malantaw rason nga posible nagdumot kag nagpatay sa iya.
Ginkumpirma man sang natungdan nga nakaagi na sungka sa Oplan Tokhang sa mga otoridad ang biktima.
