ILOILO CITY- Ginahulat pa sang Department of the Interior and Local Government ang memorandum tuhoy sa kun ano ang ila mangin katungdanan sa patigayunon nga imbestigasyon sang Criminal Investigation and Detection Group batok sa mga Local Chief Executives may kaangtanan sa tagtaganay sang cash aid sa Social Amelioration Program.
Sa interview sang Bombo Radyo kay Department of the Interior and Local Government 6 Director Ariel Iglesia, iya ginpahayag nga wala pa sang memorandum ukon guidelines tuhoy sa nasambit nga direktiba.
Suno kay Iglesia, wala pa siya nakahibalo kun sin-o ang magapasaka sang kaso sa mga Local Chief Executives nga mapamatud-an nga may kapaltahan sa pagpanagtag sang cash aid.
Ginpahayag ni Iglesia nga handa ang ahensya sa paghatag sang bulig Criminal Investigation and Detection Group sa tion nga may patigayunon gid man nga imbestigasyon.
Sa subong suno sa natungdan, madamo sang concerns nga nabaton ang ahensya kag kun ini ang tuhoy sa guidelines sa kun sin-o ang mahimo makabaton sang cash aid, ginatugyan nila ini sa Department of Social Welfare and Development.
