Dakop sa ginkasa nga buy-bust operation ang isa ka dismissed police sa Barangay Maribong, Lambunao, Iloilo.
Ang subject amo si Jonathan Digno Limas, 54-anyos, residente sang Barangay Cubay, Lambunao, Iloilo.
Sa interview sang Bombo Radyo kay Police Major Dadje Delima, head sang Provincial Drug Enforcement Unit (PDEU), iya ginpahayag nga na-dismissed ang subject bilang isa ka pulis kasunod sang matukiban nga ginpeke sini ang iya nga eligibility sang Civil Service.
Suno kay Delima, nakuha sa posisyon sang anay pulis ang 120 gramos nga ginapahayag shabu nga may standard drug price nga P816,000.00.
Nakuha man sa suspek ang isa ka sachet sang buy-bust item, duha ka heat-sealed plastic sachets nga naga-unod sang suspected shabu, P6,000 buy-bust money, kag mga non-drug items.
Nahibaluan nga anay naman nga ginserbehan sang warrant of arrest sang Lambunao Municipal Police Station ang subject sa paglapas sini sa Republic Act 10591 ukon ang Comprehensive Firearms and Ammunition Act.
