Nagalaum si Department of Health (DOH) Undersecretary Dr. Gerardo Bayugo nga liwat nga ma-dismiss ang kaso nga ‘Reckless Imprudence resulting to Homicide’ nga ginpasaka sang Department of Justice (DOJ) sa iya kag siyam ka iban pa may kaangtanan sa kontrobersyal nga anti-dengue vaccine dengvaxia.
Sa exclusive interview sang Bombo Radyo kay Bayugo, iya ginpahayag nga nagapangamuyo siya nga kaangay sang natapos na nga pito ka kaso, liwat nga ibasura sang korte ang kaso apisar ginpahayag sang state prosecutors sang DOJ nga may may nakita nga probable cause agud ma-indict sa ‘reckless imprudence resulting to homicide’ si anay Health Secretary kag subong Iloilo 1st District Rep. Janette Garin, kag sila nga mga opisyal sang DOH, Research Institute for Tropical Medicine, Sanofi Pasteur Incorporated, kag Food and Drug Administration (FDA).
Suno kay Bayugo, nagalain gid ang iya nga buot sa amo nga balita bangud tuman siya kasako sa subong sa pag-atipan sa mga Filipino repatriates nga ginapaidalom sa quarantine bangud sang coronavirus disease 2019 (COVID-19).
Nahibaluan nga si Gayubo ang undersecretary para sa Field Implementation and Coordination Team sang DOH kag amo man ang nagapamuno sa pagsekyar sang quarantine facility sa New Clark City, Tarlac nga amo ang tiniran sang mga Filipino repatriates.
Dugang pa sang natungdan, magluwas nga usik sa tiyempo bangud kinahanglan nila nga magbalik-balik sa korte sa tion nga ipatawag sila, kinahanglan pa nila nga maggasto para sa piyansa.
Naglahog pa ang opisyal nga sa tion nga wala na siya sang sarang mabayad sa piyansa, handa na siya nga magpapreso sa kondisyon nga indi lang pag-iserbe ang warrant of arrest subong nga weekend bangud kasagsagan gid ini sang iya trabaho bilang opisyal ang DOH.
Sa subong, suno sa natungdan, wala pa sila sang nabaton nga opisyal nga dokumento nagikan sa DOJ kag sa press release pa lang niya ini nabalitaan.
