Nag-plead sang NOT GUILTY ang doktor nga nagpangluthang kadungan sang graduation ceremony sa Ateneo de Manila law school sang Hulyo 2022 nga nag-resulta sa kamatayon ni Former Lamitan, Basilan mayor Rose Furigay.
Palareho nga NOT GUILTY ang gin-plead ni Dr. Chao Tiao Yumol sa mga kaso nga three counts sang murder, one count sang frustrated murder, kag carjacking nga gin-file batok sa iya.
Matandaan nga pila ka beses nga na-delay ang arraignment sa kaso ni Yumol bangud sa request man sang iya nga kampo bangud sang ginapahayag nga mental health check agud matumod kun fit ini nga mag-partisipar sa trial.
Gindeklarar naman sang National Center for Mental Health nga masarangan ni Yumol nga makatindog sa trial.
Gintilawan pa kuntani sang defense panel nga i-postpone liwat ang arraignment apang wala na gintugtan sang korte bangud wala naman sang isyu sa mental health results.
Indi ini ang una nga tion nga NOT GUILTY ang gin-plead ni Yumol kaangot sa Ateneo shooting.
Matandaan nga sang Agusto 2, ginpahayag man sini nga indi siya guilty sa pag-angkon sang illegal firearms kag indi man siya guilty sa malicious mischief apisar gin-ako na sini una sa media nga siya ang nang-atake sa amo nga eskwelahan.
Madumduman nga ang duha ka iban pa nga napatay sang amo nga tion amo ang longtime executive assistant sang former mayor nga si Victor Capistrano kag ang Ateneo security guard nga si Jeneven Bandiala.
